Një foto e një gruaje indigjene nga Meksika, që lind fëmijën e saj në parkun pranë qendrës mjekësore për shkak se ju mohua trajtimi nga infermierët, po turpëron Meksikën.
Pas xhiros së botës që bëri fotoja, në Meksikë është hapur një debat kombëtar, ndërsa kreu i klinikës është pezulluar nga detyra.
Fotoja shokuese e realizuar nga një kalimtar, tregon 29-vjecaren Irma Lopez të ulur në gjunjë, me një fytyrë që tregon dhimbjen e madhe që ndjen në trup, ndërsa ndërsa poshtë këmbëve të saj fëmijën e sapolindur, i cili qëndron i lidhur me nënën e tij përmes kordonit të kërthizës.
Qeveria e shtetit jugor të Oaxaca-s njoftoi se për ngjarjen e datës 2 tetor është pezulluar kreu i Qendrës dr Adrian Cruz, ndërsa kanë nisur hetimet për të gjetur fajtorët për situatën e krijuar.
Zonja Lopez, nënë e tre fëmijëve tha se ajo dhe bashkëshorti i saj nuk u lejuan të futeshin në klinikë, sepse infermierja u kishte thënë se nuk ishte ende koha për të lindur, kur në fakt ishte krejt e kundërta.
Burrë e grua, të cilët nuk flasin spanjisht, nuk mund të kuptonin shumë gjatë nga shpjegimi që i tha infermierja dhe lanë ambientet e brendshme të klinikës. Nga ana e saj infermierja u shpjegua më pas duke thënë se nuk kishte arritur të merrej vesh me ciftin e bashkëshortëve dhe sqaroi se klinika nuk kishte staf të mjaftueshëm për të trajtuar këtë grua.
Një orë pasi u refuzua në klinikë, gruas i plasën ujërat. Duke ditur se kishte ardhur momenti për të lindur, Lopez e kishte të pamundur të lëvizte dhe e lindi fëmijën e saj jashtë ndërtesës mjekësore, në sytë e kalimtarëve.
"Nuk doja të lindja në këtë mënyrë, ishte e shëmtuar dhe shumë e dhimbshme", thotë zonja Lopez, e cila në momentin e lindjes ishte e vetme, pasi bashkëshorti i saj kishte shkuar të gjente një infermiere.
Social Plugin